اضافة احد الاعضاء معلومات مهمة و مفيدة للمصممين 

( اسم العضو ) «»( Mo'men Elshamy )
بتحب الphotoshop وبتحب تشتغل عليه ؟ طب شغلك محترف ولا اي كلام ولا اصلا مش عارف تقيم شغلك ، طب انت عمرك سألت نفسك السؤال ده " انت Designer ولا بتاع فوتوشوب " .
دلوقتى واحنا في 2015 هتلاحظ الانتشار الكبير لفكرة مصمم بين الشباب واعداد الناس بتوع الفوتوشوب بتزيد يوم بعد يوم ، لو انت واحد منهم وعايز تنجح لازم تتميز ، لازم تبقي Designer وسط ناس بتاعة فوتوشوب .
4 خطوات عشان تبقى Designer :
الخطوة الاولى 
قبل متقول علي نفسك DEsigner اعرف انت متخصص في ايه ، اول حاجة لازم تعملها تعرف ايه مجالات ال Graphic design المختلفة ، اسهل طريقة عشان تعمل ده 
ادخل علي صفحة المشاريع علي ال Behance هتلاقي All creative fields اضغط عليها هتلاقي كل المجالات المختلفة اتفرج بقي علي كل واحد وحدد انت هتشتغل في ايه من دول 
علي فكرة مش لازم تتقيد بمجال واحد ممكن تشتغل في مجالين بحد اقصي 3 اكتر من كده اعرف انك مش هتتميز في ولا واحد .
الخطوة الثانية
اخترت المجال اللي انت حابه وهتتميز فيه ، تمام دلوقتى بقي هتروح بسرعة تنزل برنامج ال Illustrator وديه اول حاجة هتخليك Designer مش بتاع فوتوشوب ، لو فعلا عايز تتميز لازم يبقي معاك اكتر من tool عشان افكارك وطرق تنفيذها تبقي متنوعة ، طيب يعني كفاية ال photoshop و illustrator 
الاجابة طبعا لا ، كل ما كانت ادواتك اكتر كل ما شغلك بقي اكثر ابداعا بس خلي بالك زي ما اخترت مجال هتركز فيه ، لازم هيكون فيه برنامج او اتنين مركز عليهم والباقي مساعد .
الخطوة الثالثة
دلوقتي معاد التدريب ، ديه بقي اهم خطوة هتنقلك فعلا لمستوي اعلى وهتميزك ، " التدريب " بص مهما كنت شايف مستواك محترف اوكويس فانت محتاج تدريب اي Designer بيحتاج يوميا وقت للتدريب .التدريب نوعين ( تدريب علي الادوات - تدريب عينك وعقلك) 
-التدريب علي الادوات وده انك تعرف تستخدم ادواتك بطريقة صح ولو عندك فكره ازاي تنفذها.
-تدريب عينك وعقلك وده بقي اهم اهم اهم حاجة في ال Designer صدقنى لو كنت احسن واحد في العالم بيستخدم الphotoshop بس معنكش افكار او عينك مش واخدة علي الالوان والاشكال الجمالية محدش هيسمع عنك ، ال Designer دماغ وعين قبل ميكون برنامج .
طب ازاى اتدرب علي النوعين دول ، بص بقي يا سيدي ،
اولا : تدريب عينك وعقلك ، هتروح تعمل account علي Behance ، هتحدد لنفسك يوميا ساعتين ، الساعة الاولي هتتفرج علي مشاريع خاصة بالمجال اللي انت اختارتة اتفرج وركز في الافكار حتي لو مش فاهم اتعملت ازاي مش مشكلة ، الساعة التانية هتتفرج علي مشاريع بس في المجالات التانية اللي انت مختارتهاش ، عشان تبقي Designer لازم تعرف حاجة عن كل حاجة وكل حاجة عن حاجة . 
ثانيا: التدريب علي الادوات ، بعد بقي متخلص الساعتين بتوع العين والعقل ، تروح بقي تدرب ايدك ، طب ازاى ، هتروح علي اي موقع من دول
tutsplus.com
idealdesigner.net
good-tutorials.com
المواقع ديه هتلاقي فيها Tutorials كتير جدا لكل المستويات مبتدئ او محترف ، مش مطلوب منك غير انك تشوف اكتر من tutorial وتعرف طريقة استخدام الادوات في التنفيذ وبعدين تجرب انت تعمل نفس الخطوات تجرب بايدك ، اشتغل كده لمدة 3-4 ساعات يوميا او يوم و يوم ،
ثالثا : خلال بقي ما انت بتدرب ايدك وعقلك كل يوم ، بتحاول تفكر في design جديد ليه فكره ، لازم كل اسبوع تحاول تعمل design جديد مش مهم يطلع مبهر ، بس الاهم ان اللي انت اتدربت عليه طول الاسبوع تحس انه فرق معاك في ال Design يعني المفروض ان كل اسبوع مستوي ال Design بتاعك هيتحسن عن اللي قبلة .
الخطوة الرابعة
اخر خطوة ، اعرض اعرض اعرض …….. ، اعرض شغلك عمرك ما هتقدر انت تقيم نفسك ، كل Design تخلصة كل اسبوع هتروح تعرضه علي Websites و Facebook groups المختصة بمجال ال Graphic Design وتشوف اراء الناس ايه ، متضايقش من حد يهاجمك او يسخر من شغلك ، عادى لو فضلت ماشي بالخطوات اللي عملناها ديه اعرف انه بعد كام شهر هينبهر بشغلك ومش بعيد يطلب منك تعلمه . طب ايه المواقع اللي اعرض عليها ، ديه بعض الامثلة
Behance.net
Debviantart.com
facebook.com/groups/designerexperience جروب خبرات مصمم
facebook.com/groups/Qaadetmosmmen جروب قعدة مصممين
عرض شغلك ده الحاجة اللي هتخليك عندك القدرة علي الاستمرار ، ليه ؟ لان النقد او الاعجاب باعمالك من ناس انت متعرفهاش بيكون اكبر حافز انك تستمر وتتعلم اكتر .